बार्सिलोनाको जितमा लेवान्दोस्कीको ह्याट्रिक

काठमाडौँ । रोबर्ट लेवान्दोस्कीले ह्याट्रिक गर्दा स्पेनिस ला लिगामा बार्सिलोनाले भ्यालेन्सियालाई ४–२ गोल अन्तरले हराएको छ । नोउ क्याम्पमा भएको खेलमा बार्सिलोनाका लागि लेवान्दोस्कीले ह्याट्रिक गर्दा फर्मिन लोपेजले एक गोल गरे ।

घरेलु मैदानमा भएको खेलमा लेवान्डोस्कीले दोस्रो हाफमा ह्याट्रिक गरेका थिए ।बार्सिलोनाका लागि फर्मिन लोपेजले २२औं मिनेटमा गोल गर्दै अग्रता दिलाएका थिए । तर, ह्युगो डुराले २७औं र पेपेलु ३७औं मिनेटमा गोल गरेपछि भ्यालेन्सियाले पुनरागमन गर्दै पहिलो हाफमा २-१ को अग्रता बनाएको थियो ।

तर पहिलो हाफकै इन्जुरि टाइममा मामार्दाश्भिलीले रातो कार्ड पाएपछि भ्यालेन्सिया दश खेलाडीमा समेटियो । त्यसको फाइदा बार्सिलोनाले दोस्रो हाफमा उठायो ।

बार्सिलोनाका लागि लेवान्डोस्कीले ४९औं मिनेटमा गोल गर्दै खेल बराबरी गरे भने ८२औं मिनेटमा गोल गर्दै बार्सिलोनालाई ३-२ को अग्रता दिलाए । त्यसपछि उनले दोस्रो हाफको इन्जुरी टाइमको तेस्रो मिनेटमा गोल गर्दै ह्याट्रिक पूरा गरे ।