स्वास्थ्य बिमाको सीमा पाँच लाख बनाऔँ : मन्त्री पौडेल

लेखनाथ। स्वास्थ्य तथा जनसङ्ख्या मन्त्री प्रदीप पौडेलले नागरिकलाई सहज तवरले स्वास्थ्य सेवा प्रदान गर्न स्वास्थ्य बिमाको सीमा पाँच लाख पुर्‍याउनै पर्नेमा जोड दिएको छन् । अहिले स्वास्थ्य बिमा बोर्डले चलाएको स्वास्थ्य बिमामा यसको सीमा एक लाख छ ।

पोखरा स्वास्थ्य विज्ञान प्रतिष्ठानले मङ्गलबार पोखरामा आयोजना गरेको कार्यक्रममा मन्त्री पौडेलले स्वास्थ्य बिमाको सीमा बढाउन अरू स्रोत खोज्न सकिने औँल्याए ।

“एकद्वार प्रणालीबाट काम गरौँ । बिमाको सिलिङ पाँच लाख कायम गरौँ,” उनले भने, “यसका लागि अरू स्रोत खोज्न सकिन्छ । ज्येष्ठ नागरिकलाई एक महिनाको सामाजिक सुरक्षा भत्ता कोषमा दिने प्रावधान ल्याऔँ । सबै सरकार र संस्थागत रूपमा जागिर गर्नेहरूले तलबको दुई प्रतिशत बिमा कोषमा जम्मा गर्ने नीति लिन सकिन्छ ।”

केही निजी क्षेत्रबाट सञ्चालित स्वास्थ्य संस्थाहरूले नक्कली बिमा दाबी पेस गरिरहेको औँल्याउँदै उनले बिमा बोर्डका अतिरिक्त अर्को नियमक निकायको आवश्यकतामा जोड दिए । २०४८ सालपछि सरकारी अस्पतालहरूमा दरबन्दी थप नभएको स्विकार्दै उनले नागरिकको स्वास्थ्यका लागि सरकारले जनशक्ति, उपकरण र व्यवस्थापनमा ध्यान दिनैपर्ने विचार राखे ।

ठुला सरकारी अस्पतालले यथासम्भव सबै सेवा दिनुपर्नेमा जोड दिँदै उनले ती अस्पतालहरूलाई रिफर सेन्टर जस्तो नबनाउन निर्देशन दिए ।

मन्त्री पौडेलको पहिलो निर्णय मङ्गलबारबाट गण्डकीमा लागू भएको छ । पश्चिमाञ्चल क्षेत्रीय अस्पतालमा बिपी कोइराला मेमोरियल क्यान्सर अस्पतालको विस्तारित सेवा यहाँ सुरु गर्न लागिएको हो । सोसम्बन्धी सम्झौतापत्रमा क्यान्सर अस्पतालका कार्यकारी निर्देशक डा। शिवजी कोइराला र पोखरा स्वास्थ्य विज्ञान प्रतिष्ठानका अस्पताल निर्देशक प्रा।डा। भरतबहादुर खत्रीले हस्ताक्षर गरेको छन् ।